Færeyjar eru sannarlega paradís utanvegahlauparans og sérstaklega þegar hátíðarhöld Útilív Ævintýra eiga sér stað. Fyrsta hlaupa-, ævintýra- og tónlistarhátíðin verður haldin í Færeyjum í september. Þar verður meðal annars hægt að taka þátt í utanvegahlaupi, klettaklifri, fjallamennsku og fara á kajak. Boðið verður uppá 13km, 21km, 42km og 70km utanvegahlaup. Innifalið í þátttökugjaldi eru aðgangur að skráningarhátíð, uppskeruveisla að hlaupi loknu, kvikmyndakvöld, færeyskur matur og ýmislegt annað. Gönguferðir verða í boði uppá fjallstinda, að fossum og björgum; hlaup á gömlum götum milli afskekktra bæja, tinda og vatna; kvikmyndahátíð á ævintýralegum nótum og fyrirlestrar. Viðburðurinn er skipulagður af Little Big Adventures sem einnig bjóða upp á allskonar afþreyingu annað hvort á eigin vegum eða með leiðsögn. Einnig verður boðið upp á tjaldferðir, rafting, sund, kajakferðir, siglingar og brimbretti. Sjálfbærni er kjarni hátíðarhaldanna og verður meðal annars staðið fyrir hreinsun á ströndinni í samvinnu við góðgerðasamtök á svæðinu.